Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

El Molín

- elmolin.jpgEn llegando la collecha, los llabriegos recoyíen el cereal. Has saber que n'otru tiempu, amás del maíz que yá conoces, los nuestros güelos semaben otros cereales como la escanda, el trigu y el miyu. Ye bien probable que vieres dacuando una espiga de trigu, pero nun olvides qu'anguaño esti cereal espoxiga namás qu'en Castiella.

El granu que recoyíen separtábenlo de la paya. La paya usábenlo pa mullir, enllenar y cubrir construcciones. N'Asturies, el granu de los cereales cómese namás qu'en forma de fariña y esto ye perimportante porque cola fariña facemos el pan, la masa de les empanaes, les casadielles o los frixuelos.

El molín yera hasta hai bien poco, por dicilo asina, la fábrica de la fariña. Mira ver si t'enteres de que siga funcionando dalgún cerca d'onde vives. N'Asturies hubo hasta cinco mil molinos en funcionamientu. Equí hai bayura de ríos, regueros y regatos gracies a la lluvia, asina que yá imaxineríes que tamos falando de molinos d'agua. La fuercia l'agua dende un sitiu altu mueve una rueda con paletes, el rodendu, que fai dar vueltes a una piedra circular que llamamos muela y que muel el granu.