Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Trabayar con Trebeyos


Foi una esposición de Chelo Torres, de l'Asociación Cultural Arcu la Vieya, que visitaron 500 alumnos/es de les escueles de Xixón, ente los díes 1 y 15 de febreru de 2006.

El so oxetivu fundamental foi averar a los escolinos y les escolines del conceyu a la conocencia de dellos aspeutos de la cultura y les tradiciones d'Asturies.

Los conteníos que se-yos esplicaron facíen referencia a distintes actividaes de la sociedá del país, mui importantes n'otres dómines, y qu'anguaño alcuéntrense arrequexaes o escaecíes dafechu.

Pente medies d'una visita guiada falábase-yos a los rapacinos y rapacines d'actividaes esenciales pa los nuestros güelos.

Estayes

  • La llana y el llinu, con representaciones del traxe de país de les distintes fasteres d'Asturies: occidente, oriente, centru, y tamién un traxe de boda.
  • La ferrería, la piedra d'afilar, les guadañes.
  • El molín, el batán.
  • La ellaboración del pan.
  • La romería.
A partir d'estes cinco estayes principales foi esbillándose toa una riestra de temes llaterales como por exemplu: la tosquila, el filáu y los sos preseos, los xastres o alfayates; la sema de la escanda y el trigu, la maquila; les ferramientes que salíen de les ferreríes; l'alborada...

Amás los neños y neñes tamién xugaron. Dióse-yos material educativo y pintures pa dibuxar lo que más-yos prestó de la esposición. Tamién se ficieron xuegos y actividaes rellacionaes cola Llingua y la Cultura Asturiana.