Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Andrés Solar

devaAl rodiu de la figura del escritor de Deva fízose una actividá empobinada a los neños y les neñes qu'estudien llingua asturiana nes escueles de Xixón. Fueron a visitar la parroquia de Deva los/es alumnos/es de cuartu, quinto y sestu cursu de Primaria.

Los escolinos y les escolines avérense a l'arte, flora, fauna y toponimia d'esta parroquia al tiempu que conocen daqué de la vida y obra del escritor xixonés.

Tolos llugares pelos que pasen apaecen nomaos na obra del escritor: la vieya ilesia de San Salvador de Deva, el llavaderu, les antigues escueles, los Sietos, la Rionda, el Peñatu El Melandru, el barriu d'El Fondón...

Andrés Solar, una voz del Surdimientu

- m_andres_solar.jpgNes antigues escueles pudo visitase esta esposición na que s'esplica la vida y obra del escritor.

Escritor, poeta y activu militante asturianista nos años de transición y los entamos de la democracia, ye una de les más interesantes figures de lo que se dio en llamar Xeneración del Surdimientu.

Nació n'El Fondón de Deva (Xixón) el 21 d'agostu de 1955 y morrió una nueche del 27 d'avientu del 1984 nun accidente de coche.

Falante d'asturianu dende neñu, escomencipió la so actividá lliteraria nel 1979. Foi ganador de dellos premios y miembru correspondiente de l'Academia de la Llingua Asturiana. Consideráu como ún de los meyores escritores del "Surdimientu" asturianu, destacó pol emplegu d'una llingua rica y trabayada al empar que fiel a la fala del pueblu.

"El llavaderu ye onde, tolos llunes, apáutense les muyeres pa dir a llavar la ropa puerco de tola selmana. Ye una xera estoposa. Pero pa elles, dir al llavaderu ye trabayoso namás que pa cuntalo: "Vaya batán, llunes y otra vegada a llavar". El llavaderu ye'l periódicu nel que salen asoleyaes toles noticies de diferente triba que surden nel pueblu y nos pueblos d'al llau; más o menos espurríes, más o menos agorrumbaes, más o menos tracamundiaes; too depende del calter y la maxinación de la sopelexadora de cada momentu. Los llunes que nun hai abondes noticies, "la fueya'l Llavaderu" dedíquenla a la narrativa, texendo histories a la salú de la boca y afargatando les más de les páxines del tiempu con casorios naguaos o suañaos...

"Xuan y Xuanín" px. 63 Muestra Lliteraria".

Si quies conocer dalgo más sobre esti xixonés, pues calcar nos enllaces que vienen darréu: