Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Danciando tol añu


Con esta actividá preténdese que l'alumnáu s'anicie nel conocimientu y práutica de los bailles y dances tradicionales n'Asturies, conociendo los
pasos más básicos y les estructures más simples, trabayando sobre too los bailles-xuegu y distintes manifestaciones coleutives, como les dances.

Llugar: Ximnasiu del colexu
Númberu de escolinos/es: máximu 25
Duración: 2 hores
Recursos de baldre: guía didáutica.

Danciando


Qué vamos trabayar

Pa entamar escoyimos unes poques pieces cencielles y interesantes, sobremanera nesta etapa escolar (2u, 3u y4u de primaria). Con elles vamos trabayar:

- La socialización, que favorez que les persones participantes tomen conciencia de grupu.

- La imaxe y perceición del propiu cuerpu y del restu participantes.

- La perceición temporal reconociendo los distintos tiempos del baille.

- La coordinación dinámica xeneral.

- La rellación del baille en grupu con una actividá de participación, de risa y disfrute.

- La perceición y estructuración espacial guardando distancies cola pareya, treslladándonos hacia la manzorga y a la derecha curiando l'amplitú de los movimientos hacia ún y otru llau, etc.


Un pasu, dos pasos... y a baillar    


Llega'l momentu de falar de los pasos. Pero enantes ye importante saber que:

- La unidá básica d’un baille o danza ye lo que se conoz como PASU o PUNTU.
- Combinando unos cuantos pasos o puntos tenemo suna MUDANZA.
- Con delles mudances tenemos un BAILLE.

Agora vamos colos nomes y la descripción de los pasos más básicos que tenemos que deprender y prauticar pa ponenos a baillar.

                                                   Tipos de baille                                      

PASÉU: 
Esti pasu ye col que s'entama davezu la mudanza. Desplazámonos caminando llateralmente d'un llau al otru en 3 tiempos. Según dibuxu:
1) Caminamos apoyándonos sobre D.
2) Agora facemos lo mesmo, apoyándonos sobre I.
3) Nel últimu facémoslo apoyándonos sobre D al mesmu tiempu que dexamos el pie I n'alto per delantre de D. Nesta parte los brazos tán normalmente cayíos.

PICÁU:
 Ye’l pasu central de la mayoría de los bailles tradicionales y davezu apaez combináu con otros pasos. Los brazos equí llevántense a l'altura de los güeyos nel casu les muyeres y un pocu más arriba nel casu los homes. Tien 3 movimientos. Según dibuxu:
1) Saltar y apoyar el cuerpu sobre I.
2) Llevantamos I y picamos, posando D.
3) Volvemos a apoyar sobre I.

XOTA: Equí topámonos con una combinación de dos pasos: la xota y el picáu. Con un pie posicionáu delantre del otru, siguiendo'l dibuxu, damos un güelpe seliquín en suelu cola parte delantera del pie. Con esi mesmu pie facemos un picáu como desplicamos enantes.

EMBOTÁU: Ye otru de los pasos básicos. Trátase de dir cruciando los pies per detrás o per delantre dando botes.


Tipos de bailles

N’Asturies podemos distinguir, atendiendo a la so forma, los siguientes tipos:

• Bailles en corru (xirandiyes, cariaos...).
• Bailles de pareyes sueltes o a lo suelto (xotes, muñeires, saltón...).
• Bailles xuegu (El bolero, La xeringosa...).
• Bailles de pareyes enllazaes o a lo agarráo (valsiaos, rumbes...).
• Danza Prima (Danza Santana, Danza Les Vieyes...).
• Dances Procesionales (Danza d’arcos, Danza de los romeros...).

Baille y danza tán presentes a lo llargo la vida. Cuando yes tovía un nenu o una nena y entames a caminar, el primer contautu que se da col baille ye al traviés de los bailles-xuegu y dalgunos bailles en corru. De la que vas medrando y aportes a la mocedá, entamabes a metete colos bailles a lo suelto y a lo agarrao.


Danciando final

Consultar guía completa