Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Esposición y charra del CCAI: Les nuestres güeles

Votos

(Total de votos recibidos 2)

(Puntuación 4,00)

Guela
Del 17 al 31 de mayu, la Sala 3 del CCAI va acoyer el perguapu resultáu del trabayu de los grupos de fotografía de la Universidá Popular, coordinaos pol so profesor Fernando González.
Esta amuesa quier ser un homenaxe, un agasayu y un reconocimientu a les güeles, eses muyeres que lleven a recostines una vida entera de trabayu, crianza, vezos, afalagos, añaes y renuncies… vivencies qu'apinen no más fondero de los sos güeyos. Pero si miramos con procuru, nun mos va costar ver, tres d'eses arrugues, a la neña que pervive en munches d'elles y que sal dando reblagos a la mínima ocasión.

Les güeles son muyeres que lleven tola vida trabayando, cobrando o ensin cobrar, pero que tamién tienen aficiones, intereses y entretenimientos. Con esta esposición queremos superar l’esteriotipu y llegar a la realidá de muyeres mui diferentes que conducen, lleen, faen deporte o falen seliquino sentaes nun bancu. Con esta amuesa queremos qu’asome esa parte emocional y familiar onde les güeles dexen ver los sentimientos cuando apaecen fíos, fíes, nietos y nietes o mascotes.

Los retratos de muyeres arguyoses de la so vida son l’alfa y l’omega d’esta esposición que fai un percorríu per toles facetes de les vides de les nuestres güeles.

Si vos apetez, podéis traer semeyes de les vuestres güeles pa dir escolingándoles toes, como un ‘collage’, nun señardosu y artísticu tendal metanes la esposición.

Como actividá complementaria, el vienres 26 de mayu a les 18.30 h, na sala de conferencies, va haber una charra. Artistes asturianes de renome como Anabel Santiago o Ana Vanessa Gutiérrez van facer alcordanza de les sos güeles y tolo que supunxeren pa la so vida y la so obra.

Averáivos al CCAI, que de xuru qu’esfrutáis enforma coles nuestres güeles, coles vuestres, coles de les artistes y coles de toes y tolos xixoneses.